Henrique Dacosta intérnase no thriller policiaco en «Mortes con argumento»

A costa ferrolá e as súas xentes protagonizan a última novela de Henrique Dacosta, «Mortes con argumento», que vén de publicar a editorial Belagua Ediciones, e que se presentou o pasado xoves, día 11 de decembro, ás 19.30 horas no Centro Cívico de Canido (Ferrol), nun acto conducido polo xornalista Xosé Fandiño e organizado pola asociación sociocultural Muíño do Vento.

Tres anos despois da publicación do seu libro de relatos «O estraño caso da bicicleta amarela» (Belagua, 2022), o profesor e escritor ferrolán sorpréndenos cunha novela de xénero policial ambientada no contexto rural e mariñeiro da terra na que adoita situar as súas historias para trasladarnos a súa idiosincrasia.

En «Mentes con argumento», Henrique Dacosta abandona o relato curto para debuxar unha ampla panorámica das ameazas que sufren tanto a paisaxe natural das nosas costas como as formas de vida tradicionais, pano de fondo para narrar unha trama onde se entrecruzan dúas mortes en estrañas circunstancias e as súas correspondentes investigacións policiais.

Henrique Dacosta, estudoso das tradicións, a etnografía e a lingüística da contorna de Ferrolterra, logra unha excitante novela que mergulla o lector nun xogo sen fin polo que desfila un bo elenco de personaxes, todos con algo que ocultar.