PAXARO

Ninguén asoballará a Bernice Meetoos.
Bernice Meetoos, a miúdo alcumada Birdie (paxariño), é unha fermosa e grande muller cree que agocha un segredo. En Paxaro seguiremos a súa viaxe física dende o seu fogar nunha reserva de Alberta ata Gibsons, na Columbia Británica, e tamén a súa viaxe no transo que a obriga a mirar con outros ollos a súa vida. Nesa procura dun fogar, dunha familia e dunha acollida, Bernice, na compaña da tía Val, da súa curmá Freda a Fraca, e de Lola, axúdanos a percorrer un país do que pouco coñecemos.
Lonxe do relato oficial do Canadá, da man das tradicións cree e da solidariedade entre as mulleres, Bernice aparece ante nós como unha muller extraordinaria que viaxa ao máis fondo do seu ser para recuperar a forza que precisa para reconstruír a súa vida.
Paxaro é unha conmovedora novela sobre a superación da dor individual e colectiva, na que a lingua propia, a conexión coa Terra, a cultura e coas mulleres que a foron creando axuda a reconfigurar o futuro.

SOBRE A AUTORA

TRACEY LINDBERG é cidadá da Nación cree das Rochosas As’in’î’wa’chî Ni’yaw e provén da Nación cree de Lake Kelly. Medrou en pequenas cidades e vilas do norte de Alberta e Saskatchewan. Recibiu numerosos premios como escritora de traballo académico, dado que é experta en estudos indíxenas e dereito indíxena en diferentes universidades canadenses. Paxaro é a súa primeira novela, un súper vendas que recibiu o premio de libro do ano por parte da CBC (a televisión pública canadense) e o National Post, ademais de ser finalista de Canada Reads, o Alberta Reader’s Choice Award e o KoboEmerginin Writer Prize, ademais do International Dublin Literary Award.